PROPOSTAS DE TRABALLO

Dado que estes días imos ter que pasar moito tempo na casa é importante manter unha rutina de traballo para non esquecer o aprendido, non perder habilidades e pasar o tempo o mellor posible.

Coas actividades que vos presentamos a continuación pretendemos que os nenos e nenas traballen aspectos relacionados coa autonomía, psicomotricidade grosa e fina, expresión oral, lectoescritura e lóxica-matemática.

Estas actividades son soamente propostas, polo que non terán que facerse todas diariamente. Podedes seleccionar as que prefirades ou incluso engadir todas aquelas que se vos ocorran.

·        AUTONOMÍA PERSOAL:

-          Colaboramos nas tarefas da casa (colocamos os xoguetes na súa caixa, recollemos a roupa, elaboramos receitas, poñemos e quitamos a mesa, tentamos facer a nosa cama aínda que sexa con axuda, …)

-          Traballamos a autonomía durante o aseo e a alimentación (poñémonos e quitámonos sós e soas a roupa, lavado de dentes, lavado de cara e mans, empregamos os utensilios axeitados para comer, probamos alimentos novos…

·        PSICOMOTRICIDADE GROSA E FINA:

-          Non levar vida sedentaria. Na casa temos que movernos (gateamos, reptamos, saltamos, rodamos, bailamos ao ritmo da música movendo todo o corpo ou soamente a parte que lle mencionemos…). Facemos actividades de relaxación despois de actividades de movemento a través de exercicios de respiración.

-          Xogamos coas pinzas da roupa, enroscamos e desenroscamos tapóns, abotoamos calquera tipo de botóns, subimos e baixamos cremalleiras, facemos tiras de papel cos dedos, facemos bólas con papel ou plastilina, recortamos coas tesoiras…

·        EXPRESIÓN ORAL:

-          Falamos e conversamos moito con eles e con elas sobre calquera tema (as súas propias emocións, temas actuais e/ou que lles preocupen, relacionado co proxecto traballado no cole…), sobre contos, películas, adiviñas, poesías, cancións…

·        LECTOESCRITURA:

-          Despois de ler ou escoitar un conto asegurámonos da súa comprensión facéndolles preguntas sobre o mesmo.

-          Facemos un rexistro do conto lido no que escribiremos o noso nome, a data, o título do conto, escribimos palabras que conteñan a sílaba que lles digamos, debuxamos o conto…

-          Recortamos imaxes de folletos e as pegamos nun folio. Escribimos o seu nome.

-          Escribimos a lista da compra ou calquera outra lista de palabras que se vos ocorra (amigos, familiares, animais, comidas favoritas, deportes…)

-          Escribimos unha receita elaborada anteriormente.

-     Escribimos un pequeno diario como o que facemos no verán.

·        LÓXICA-MATEMÁTICA:

-          Manipulamos obxectos, clasificámolos, seriámolos, contámolos…
-     Rodeamos o día no calendario e debuxamos o tempo (chuvia, sol...) 
      Contamos os días que faltan para: rematar o mes, para que chegue a primavera, para chegar a un día determinado que lle digamos...

-          Escribimos e lemos números con xogos como bingo, dominó de puntos, parchís, xogo da oca…

-          Contamos números para diante e para atrás.

-          Escribimos os números que faltan nunha lista que lles damos.

-          Escribimos o número anterior e posterior dun número determinado.

-          Escribimos unha lista de números dende o 0 ata o que saibamos.

-          Resolvemos problemas de engadir e quitar nos que haxa que manipular obxectos.

-          Plantexámoslles problemas de engadir e quitar oralmente.